Prentsa ohar honen bidez, iritzi publikoari jakinarazi nahi diogu Facebookek Txalapartak webgune horretan daukan orrialdetik Itziar Zigaren Sexual Herria liburuaren azala kendu duela, dirudienez, enpresa horren arauak hausten dituelako. Zoritxarrez, ez da zentsura mota hau jasaten dugun lehen aldia: antzeko zerbait gertatu zitzaigun Diana J. Torresen Pornoterrorismo liburuaren aurkezpenaren bideoarekin. Duela bederatzi hilabete Youtubetik kendu zuten antzeko arrazoiak argudiatuz. Aipatu bi kasuetan, soil-soilik emakumezkoen titiak daude ikusgai. Berriz ere publikoki moralkeri faltsu hau eta sexu- zentsura honek eta, oro har, edozein zentsurak dakarten adierazpen askatasunaren kontrako erasoa salatu nahi ditugu. Interneten edo edozein komunikabidetan gizonezkoen bularrak, hilketak, erasoak, gizaki edo animalien sarraskiak edota gu eta gure morala “zaintzen” dituen sistemak sortzen duen gosearen irudi moralgabeak ikus ditzakegu. Emakume baten bular biluzia erakusten duen liburu baten azala, ordea, zentsuratu egiten dute.
Gertakari honen aurrean, gizartean nagusi den moral sexista eta heteronormatiboa salatu nahi dugu. Hau zen, hain zuzen ere, Pornoterrorismo edota Sexual Herria bezalako liburuekin eraitsi nahi genuena. Argi dago borroka honek gudu-zelai ugari dauzkala eta, batez ere, irabazteke dagoela. Horregatik, gizarteari eskatu nahi diogu eraso neokontserbadore hauek borrokatu eta sala eta ditzan.

Euskadi Sarietako epaimahaikideek Joseba Sarrionandiaren Moroak gara behelaino artean saritzea erabaki ostean, Eusko Jaurlaritzak, Blanca Urgell buru zuela, saria ematea baina sariaren dirua bahitzea erabaki zuen, iurretarraren, euskal kulturaren eragileen eta gizartearen gehiengoaren ustearen eta borondatearen kontra. Azkenean, Espainiako Auzitegi Nazionalak idazlearen aurkako auzirik ez dagoela esan ostean, Urgellek idazleari saria eta sariaren dirua ematea erabaki zuen. Hala, bada, hasierako erabaki politikoan atzera egin ondotik, sari banaketara joatea erabaki zuen Sarrionandiaren familiak. Bertan, idazlearen gutuna irakurri zuen Marije Sarrionandia arrebak; idazleak eskerrak eman zizkion epaimahaikideei “erakutsitako ausardiagatik” eta eskerrak eman zizkien, halaber, “Espainiako prentsan, batez ere, satanizatuaren defentsa egin dutenei, non euskaldunok hainbat alorretan arerioen lurrean bezala ibili behar dugun”.

Sisifo maite minez (Txalaparta, 2001) Laura Mintegiren eleberria nederlanderaz argitaratu da Sisyphus verliefd izenburuarekin (Peter Smaardijkek egin du itzulpena). Azaroaren 12an egin zen aurkezpena Amsterdameko Perdu fundazio literarioan. Maitasuna eta askatasuna gaiak ardatz hartuta solasean aritu zen Amsterdamen bizi den Aitziber Renteria psikologoa Laura Mintegirekin.

Edorta Jimenezen Piztien itsasoa trilogiak euskaratik beste hizkuntzetara jauzi egiten jarraitzen du. Sukar ustearen urtea italieraz argitaratu du Giovanni Tranchida argitaletxeak, Il nemico a bordo izenburuarekin. Aldi berean, Alemaniako Mohland argitaletxea Baleen berbaroa alemanez argitaratzear dago eta Bego Montorio itzultzailea, Azeria eta Lehoia gaztelerara itzultzen hastear. Hizkuntza askoren itsasoak zeharkatuko ditu aurki Sebastian Zubiletak... zorte on!

Gatuzain eta Txalaparta argitaletxeen elkarlanari esker kalean dago Edurne Elizondo kazetari eta idazlearen liburua: Ez dugu nahi. Intsumisioaren ahotsak Euskal Herrian. Elkarrizketen bidez, kazetari nafarrak intsumisioaren borrokak Euskal Herrian izan zituen alderdi ezberdinak azalera ekarri ditu. Ahots guzti horiek berreskuratu nahi izan ditu, eta, gaur egun ere baliogarriak direlakoan, liburuaren bultzatzaile izan diren intsumituen laguntzaz, urria eta azaroan zehar jendaurreko aurkezpenak egingo dituzte Iruñean, Santurtzin, Ondarroan, Eibarren, Uztaritzen, Maulen, Donibane Lohizunen, Garazin eta beste hainbat herritan.