Moulines filosofoaren ustez, egun, XIX. mendearen erdialdean bezala, mamu bat dabil Europako kantzelergoetan barrena. Baina, gure XXI. mende honetan, mamua ez da Marxek eta Engelsek aipatzen zuten komunismoa, nazionalismoa baizik. Hala, bada, nazionalismoaren inguruko gogoeta sakona burutzen du Moulinesek maila kontzeptual zein moralean. Bere ustetan, pluralismoaren berezko balioaren printzipio "ekologista" garbian sinetsiz gero, etniak eta nazioak babestu beharreko zerbait dira inori kalte egiten ez dioten neurrian. Horregatik, orriotatik dei egiten digu: "(Makurtuta eta irainduta zaudeten) mundu guztiko naziook: bat egizue (Estatu hegemonikoen aurka)".
