Harrokeriaz ageri bazaigu ere, munduaren jabe den kapitalismoak gorabehera handiak bizi ditu. Zalantzak eta kaosa dira nagusi maila ekonomikoan, ideologikoan eta politikoan, eta ezinegona gero eta handiagoa da bere baitan. Gero eta gehiago dira mundu guztian barrena kapitalismoa ezbaian jartzen duten ekarpen teorikoak. Eta hauekin batera egitasmo historiko berriak doaz garatuz, munduaren gehiengoak elkartuko dituzten eta etorkizuneko iraultzak ahalbideratuko dituzten manifestuak. Saiakera hauek mende berriaren gizarte-antolaketari buruzko proposamen aurreratuenetakoak biltzen dituzte.
