«1700. urtetik gaur egun arte ardo-saltzaile familia frantses bat dago Espainiako tronuan tronatzen eta tronpatzen. Zer dela eta jasaten dituzte herriek sistema, egoera eta txotxongilo ustel eta gezurti horiek urtez urte eta mendez mende? Argi dago: txotxongiloak, baita errepubliketan ere, erregetxo zapaltzaileak bihurtu direlako, eta ondoan defendatzaile sutsuak dituztelako: interes pertsonala duten Dorreak, mimatutako eta ondo elikatutako Zaldi saltariak eta ezjakintasunean mantendu dituzten Peoiak, arbasoen gosetearen mehatxupean… Historian, xakean lez, partida erregea erortzearekin bukatu beharko litzateke. Baina ez da hori amaia: beste Errege batek, zuria zein beltza, zutik jarraitzen du. Monarkiaren fartsa tragikoak bere horretan dirau…». Vázquez de Solak Borboien monarkiaren ezohiko biografia marrazten du lan honetan, karikatura bikainen eta umore handiaren laguntzaz.
