«Bizitzan bi motatako hitzak daude: egunekoak eta gauekoak. Eguneko hitzek gure pentsamenduarekin dute zerikusia, gure arrazoiarekin, gure erabakiekin. Gaueko hitzak, berriz, geure sentimenduetatik sortzen dira, geure irrika eta desioetatik, eta askoz ere libreagoak dira, benetakoagoak». Hitz iradokitzaile hauexekin hasten da liburu honen bizkarrezurra den gaueko irratsaioa. Bertan, hitzek, gau-jantzi dotorez, topo egingo dute musika, amodioa, deslilura eta misterioarekin. Irakurketa aukera zabala eskaintzen dio irakurleari ikuskizun literario izateko sortu zen Mundua lo dagoen bitartean proiektuak edo liburu bakarrik ez den liburuak.
"Gazteentzako ‘ikuskizun literario’ bat egiteko enkargua jaso nuen. Hitzaren plazerean oinarritutako ‘zerbait’ nahi zuten gazteentzat, irakurketa dramatizatua agian, zerbait eszenikoa, Bilborock-en 2005eko udaberrian eskaintzeko. Eskaria euskara elkarteen Topagunetik jaso nuen, (...) eta ezin uka hasieran nahasi sentitu nintzela, eta noragabe, baina hain zuzen ere ezintasun horrek are gehiago motibatu ninduela baiezkoa ematera. (...) Hala bada, hasierako nahasmendua gorabehera, luze gabe konturatu nintzen gaueko irratsaioek egitura ezin hobea eskaintzen zidatela nire lana garatzeko, gazteekin sintonia eta harreman zuzena lortzen saiatzeko, itzulinguru askorik gabe: hitz idatzian oinarritutako ahotsa bilatuko nuen, gaueko hitzen xuxurla, edota garrasia". Patxi Zubizarreta
