“Oinarri historikorik gabea”, “entelekia”, “asmakizuna”, “iruzurra”… 2000. urtetik gaur egun arte Euskal Herria kontzeptuari egin zaion aurrekaririk gabeko erasoaren lekuko izan gara: “Euskal Herriko historia Nafarroarekin batera kontatzen duten eskolak jazarri eta zigortu behar ditugu”, esan zuen Miguel Sanz Nafarroako Gobernuko presidenteak, 2003an. “Euskal Herria iruzur bat da”, berretsi zuen Jose Maria Aznarrek, 2008ko urtarrilean. “Zapaterok bi hilabeteko epea eman du Euskal Herria terminoa euskal eskoletako Curriculumetik ezabatzeko”, irakur zitekeen El Correo kazetan (08.VI.26). 2011ko maiatzean, Nafarroako Justizia Auzitegi Nagusiak legez kanpokotzat jo zituen Euskal Herria hitza dakarten euskarazko testuliburu guztiak. Ordurako, eguraldiaren mapa aldatu egin zuten euskal telebistan, jazarpen mediatiko izugarriaren ondorio. Liburu honek mila mapa baino gehiago biltzen ditu, lau edo zazpi euskal probintziak jasotzen dituen eta azken mendeetan editatu den kartografia. Halaber, euskaldunen herriaren izenaren historia aztertzen du mundu osoko literaturan, entziklopedietan, bidaiarien gidaliburuetan, bando ofizialetan… Izen bat, lurralde bat, historia bat. Eta, beste behin ere, agerikoa azaltzeko beharrezko liburu bat.
