Egungo eredu sozioekonomikoak porrot egin du. Bai Euskal Herrian, bai mundu osoan. Liburu honetan, eredu ekonomiko berri eta solidarioago bat eraikitzeko bideari ekitea proposatzen du Nekane Juradok, Santi Duñaiturriaren eta Eusebio Lasaren laguntzaz. Aberastasuna modu bidezkoan banatzen duen eredua, gehiengoaren beharrak asetzen dituena, gizartearen parte-hartzea eragiten duena, langabeziari aurre egiten diona. Hori da helburuetako bat, alegia, izateko, bizitzeko eta mundua ezagutzeko modu berri bat sortzea, etxetik hasita, ezagutzen dugun lekutik, Euskal Herritik. Eta baita oinarritik ere, herritik, langileetatik –emakumeak, etorkinak eta behartsuenak bereziki aintzat hartuz–. Aldarrikapen historikoak ez baitira independentzia desiragarri egiten duten bakarrak; arrazoi ekonomikoek ere behar bazterrezin bihurtzen dute.
