Gari Berasaluze Ostolaza (Getaria, 1975). Euskal Filologia ikasi bazuen ere, kazetaritzan aritzen da lanean gaur egun, hainbat urtez Urola Kostako Hitza egunkariko zuzendaria eta Txalaparta argitaletxearen euskarazko liburuen argitaratzailea izan eta gero. Lehenago, Euskaldunon Egunkariako literatura gehigarriaren arduraduna ere izan zen, eta bertan egindako lanari esker Rikardo Arregi kazetaritza saria jaso zuen 1998an. Liburugintzan, Azaro urrunetako intifadak (Elkar, 1996), Bobbyren hauspoa (Ibaizabal, 1999), Tulipa gorriak (Txalaparta, 2002) eta Elurra ezin da erosi (Txalaparta, 2008) lanak argitaratu ditu, baita Fidel Castroren Askatasunaren eskola (Txalaparta, 2000) eta Marcos komandanteordearen Zapataren koloreak (Txalaparta,2003) euskaratu ere. Aitortu daitezkeen bizioen artean, argazkilaritza eta sukaldaritza ditu gustukoenak.
